Isaiah 32

Umbuso Wokulunga

1Khangelani, inkosi izabusa ngokulunga
lababusi bazabusa ngemfanelo.
2Umuntu ngamunye uzakuba njengesihonqo sokuvikela umoya,
lesiphephelo sokucatshela isiphepho,
njengezihotsha zamanzi enkangala
njengomthunzi wedwala elikhulu elizweni elomileyo.

3Lapho-ke amehlo alabo ababonayo kawasayikuvaleka,
lezindlebe zalabo abezwayo zizalalela.
4Ingqondo yowalazelayo izakwazi, iqedisise,
ogagasayo ulimi lwakhe luzatshwaphuluka luzwakale kuhle.
5Isithutha kasisayikuthiwa ngumhlonitshwa,
lesigangi kasiyikuhlonitshwa.
6Ngoba isithutha sikhuluma ubuwula,
ingqondo yaso isebenza ububi:
Senza imisebenzi yenkohlakalo,
siqambe amanga ngoThixo;
abalambayo kasibaniki lutho,
abomileyo sibancitsha amanzi okunatha.
7Izindlela zesigangi zimbi,
senza amacebo amabi
ukuba sichithe abayanga ngamanga,
lanxa isikhalazo sabaswelayo siqotho.
8Kodwa umuntu ohloniphekayo wenza amacebo ahloniphekayo,
njalo uma ngezenzo ezihloniphekayo.

Abesifazane BaseJerusalema

9Lina besifazane elingakhathazeki ngalutho,
vukani lilalele kimi;
lina madodakazi elizizwa livikelekile,
lalelani engikutshoyo!
10Ngesikhatshana nje esedlula umnyaka
lina elizizwa livikelekile lizathuthumela;
ukuvunwa kwevini akuyikuphumelela,
lokuvunwa kwezithelo akuyikuba khona.
11Thuthumelani lina madodakazi azizwa evikelekile;
qhaqhazelani lina madodakazi azizwa evikelekile!
Khululani izigqoko zenu,
lithandele inkalo zenu ngamasaka.
12Zitshayeni izifuba zenu ngenxa yamasimu amahle,
langenxa yezivini ezithela izithelo,
13langenxa yelizwe labantu bami,
ilizwe eligcwele ukhula lameva,
yebo, lilelani zonke izindlu zenjabulo
ledolobho lokuzitika lentokozo.
14Inqaba enkulu izatshiswa,
idolobho elilomsindo lizatshiywa;
inqaba lomphotshongo wokulinda
kuzakuba ngumhlabathi ongatheli lutho kokuphela,
kube yintokozo yabobabhemi lamadlelo emihlambi,
15umoya uze uthelwe phezu kwethu uvela phezulu,
inkangala ibe ngumhlaba ovundileyo,
umhlaba ovundileyo ube njengenhlabathi.
16Ukwahlulela kuhle kukaThixo kuzakuba khona enkangala,
ukulunga kube khona emhlabeni ovundileyo.
17Izithelo zokulunga zizakuba yikuthula;
okufaneleyo kuzaletha ukuthula zwi lethemba kuze kube nininini.
18Abantu bami bazahlala ezindaweni ezilokuthula,
emakhaya avikelekileyo,
ezindaweni zokuphumula ezingelahlupho.
19Lanxa isiqhotho sitshabalalisa ihlathi
ledolobho lidilizwe laphela nya,
20yeka ukubusiswa elizakuba yikho,
lihlanyela inhlanyelo yenu emaceleni ezifula zonke,
njalo liyekela inkomo zenu labobabhemi benu ukuba kusabalale.